ad

चेक बाउन्स मुद्दाका फरार पक्राउ, स्रोत नखुलेको १० लाखसहित दुई जना पक्राउ

202



बैंकिङ कसुर मुद्दामा फरार रहेका व्यक्तिलाई प्रहरीले पक्राउ गरेको छ।

केन्द्रीय अनुसन्धान ब्युरोले दोलखा भिमेश्वर नगरपालिका-३ घर भई हाल काठमाडौं गोकर्णेश्वर नगरपालिका-३ मा बस्ने ४३ वर्षीय जितेन्द्रबहादुर रिजाललाई पक्राउ गरेको प्रहरी उपरीक्षक (एसपी) कमल थापाले जानकारी दिए। उनलाई प्रहरीले बिहीबार काठमाडौंको सुन्ताखानबाट पक्राउ गरेको हो।




रिजालले आफ्नो बैंक खातामा पर्याप्त रकम नभएको जानीजानी चेक काटेर दिएका थिए। उनले एनआइसी एसिया बैंक खाताबाट २०७५ भदौ १५ र कात्तिक २८ गते चेक काटेर पीडितलाई दिएका थिए।

तर उनले काटेर दिएको चेक बाउन्स भएपछि पीडितले अदालतमा मुद्दा हालेका थिए।

उच्च अदालत पाटनले २०७६ पुस ७ गते बैंकिङ कसुर तथा सजाय ऐन २०६४ बमोजिम रिजाललाई दुई दिन कैद र १२ लाख रुपैयाँ जरिवाना हुने फैसला सुनाएको थियो।

एसपी थापाका अनुसार ब्युरोबाट फैसला कार्यान्वयन तथा फरार प्रतिवादीहरूको खोजतलास एवं पक्राउको लागि परिचालित टोलीले रिजाललाई पक्राउ गरेको हो।

उनलाई पक्राउ गरी फैसला कार्यान्वयनको लागि शुक्रबार काठमाडौं जिल्ला अदालतमा पेश गरिएको थियो।

 

स्रोत नखुलेको १० लाख रूपैयाँसहित दुई जना पक्राउ

 

सप्तरीमा स्रोत नखुलेको १० लाख रूपैयाँसहित दुई युवक पक्राउ परेका छन् । भारतबाट नेपाली रकम भित्र्याएको आशंकामा चेकजाँच गर्दा डाक्नेश्वरी–५ का २९ वर्षीय राजेशकुमार चौधरी र शम्भुनाथ नगरपालिका १२ का २४ वर्षीय दिलीपकुमार मण्डललाई अवैध १० लाख रुपैयाँसहित पक्राउ गरेको प्रहरीले जनाएको छ ।

राजविराज–हनुमाननगर सडकखण्डअन्तर्गत छिन्नमस्ता अस्पताल अगाडि चेकजाँच गर्दा प्रदेश २-०१-००३ प ३४७८ नम्बरको मोटरसाइकलमा सवार उनीहरूको साथबाट नौ लाख ९० हजार रुपैयाँ बरामद गरेको जिल्ला प्रहरी कार्यालय सप्तरीले जानकारी दिएको छ।

स्रोत नखुलेको अबैध रुपैयाँ मोटरसाइकल र आरोपित दुई युवकमाथि थप अनुसन्धान कार्यका लागि सुनसरीको राजश्व कार्यालय इटहरी बुझाइएको प्रहरीले जनाएको छ ।

 



सम्बन्धित
Loading...
error: Content is protected !!